Oljusamstarv
Klokkan var farin um fimm seinnapartin hósdagin, tá ein ótolin borgarstjóri royndi at savna fólk sum frægast inni í Býráðssalinum. Inni í salinum hómaðist eisini ein lítil minniluti, sum hevði føroyskt sum móðursmál. Hóast kallað varð til tíðindafund var meginparturin av føroysku pressuni ikki til steðar. À skránni stóð framløga frá umboðum úr Stavanger í Noregi. Tað vóru heldur ikki lítið av fólki úr Stavanger, ið vóru til staðar í Býráðssalinum. Hesi umboðaðu bæði tað privata og tað almenna. Á odda fyri fylginum stóð sjálvur borgarstjórin í Stavanger, Leif Johan Sevland. Hesin sami legði dent á serliga tvey ting. Eitt var eitt samstarv, sum kundi mint meiri um eitt vinarbýarsamstarv, og hitt var eitt samstarv í sambandi við eina komandi oljuvinnu í Føroyum. Norðmenn meta Tórshavn og Stavanger at vera rættiliga lík, hóast tað, at oljuvinnan er trýati ár frammfyri í Norra.
Læra av royndunum
Sum áður nevnt, so vísti Leif Johan Sevland á, at Tórshavn og Stavanger kundu samstarva á nógvum ymiskum økjum. Tað, sum Leif Johan Sevland hevði sum grundarlag undir sínari framløgu, var, at Stavanger hevði royndir frá einum oljuævintýri, har Tórshavn, eins og restin av Føroyum kunnu gera sær dælt av teimum royndum ? báði við góðum og minni góðum fylgjum ? sum Stavanger hevur gjørt sær. Stavanger er í dag at kalla miðstaður fyri oljuvinnuni í Norra, og hevur tað verið talan um ein rættiliga stóran framburð, síðani oljuvinnan byrjaði har um leiðir miðskeiðis í sekstiárunum. Leif Johan Sevland vísti á, at Stavanger er vorðin ein rættiliga nútímans býur, og hetta skyldast í stóran mun oljuvinnuni. Samstundis segði Leif Johan Sevland, at Stavanger, eins og at kalla øll oljuvinnan í Norra, ikki hevði kunnað fingið glið á eina tílíka vinnu uttan við kønari hjálp uttanífrá. Tað er eisini henda hjálp, sum vinnan úr Stavanger, eins og tað almenna, eru klár til at veita føroyingum. Leif Johan Sevland vísti á, at oljuvinnan er ein stór og oftani rættiliga umfatandi vinna, og tað standast nógv árin av hesari vinnugrein. Eitt nú nevndi hann, at tað framvegis búgva lutfalsliga nógvir útlendingar í Stavanger.
Á samkomuni hósdagin talaði Leif Johan Sevland heitt fyri, at samstarv skal fáast í lag millum Stavanger og Tórshavn. Hann vísti eisini á aðrar fyrimunir við einum tílíkum samstarvi, t.d. innan skúlaverkið. Ì øllum førum var talan um eina rættiliga sjarmuoffensiv, har hann tó megnaði gløgt at halda bæði beinini á jørðini.
Fyritøkurnar klárar til føroyska marknaðin
Á samkomuni hósdagin vóru eisini umboð frá nógvum fyritøkum og stovnum úr Stavanger. Hesi umboðaðu fyri tað nógva virki, sum hava tilknýti til oljuvinnuna. Hesar fyritøkur fáast mest við at vera veitarar av tænastum ella vørum til oljuvinnuna. Tað er greitt, at oljuvinnan inniheldur nógvar hjávinnugreinir, sum gera oljuvinnuna risastóra og almikið umfevnandi.
Millum fyritøkurnar, sum vóru umboðaðar á samkomuni hósdagin, kann nevnast Møkster Shipping AS, sum eigur og rekur skip í sambandi við oljuvinnuna. Henda fyritøka er vaksin til at vera ein risastór fyritøka, og hava teir hesa seinastu tíðina lagt seg eftir serliga supplyskipum. Fyritøkan er eitt dømi um eina norska fyritøku, sum er vaksin nógv síðani oljuvinnan kom, og hevur ment seg so mikið nógv, at hon í dag er at meta sum altjóða fyritøka.
Allar fyritøkurnar, sum vóru umboðaðar á samkomuni hósdagin, søgdu seg vera sera áhugaðar at koma inn í eina komandi føroysku oljuvinnu. Fleiri av hesum fyritøkum hava eisini nýtt høvið til at vitja líknandi fyritøkur í Føroyum. Jan Christiansen, býráðsformaður, segði, at hann metti áhugan hjá hesum fyritøkum vera postivan, og sannaði samstundis at talan er um ?business?, sum hann tók til.
Eisini vitjaðu umboð fyri hægri læristovnar. Hesi hava eisini í ein ávísan mun eitt samstarv við Fróðskaparsetrið, og ynskja eisini at menna hetta samstarv.
Í øllum førum trýtur ikki við áhuga fyri Føroyum úr Stavanger, við atliti at Tórshavn og einari komandi oljuvinnu.
