Enn ein limur hevur nú tikið seg úr starvsnevnd ÍSFs. Talan er um Sølva Reinert Hansen, sum hevur boðað nevndini frá, at hann ikki longur er at rokna sum limur í nevndini.
Sølvi Reinert Hansen er triðji av teimum fimm starvsnevndarlimunum, ið hevur lagt frá sær. Herfyri segði Katrin Abrahamsen seg úr nevndini, tí hon metti, at meiri brúk var fyri henni í Fimleikasambandinum. Síðani boðaði Petur Elias Petersen frá, at hann legði frá sær sum forseti í ÍSF og tí eisini sum limur í starvsnevndini.
Hetta merkir, at starvsnevndin í ÍSF eftir øllum at døma ikki er viðtøkufør longur. Einans tveir limir eru eftir í nevndini, virkandi forsetin í ÍSF, Peter Ove Petersen, og Anna Rein.
Tað er tó ikki í langa tíð, at ÍSF verður uttan eina viðtøkuføra starvsnevnd. Aðalfundur er lýstur at vera 20. mai, og tá skulu nýggj fólk veljast í nevndina.
