Á Dímunargarði í Stóru Dímun fegnast tey um, at tey seinastu tvær vikurnar hava havt starvsnæmingar úr Havn, Elisabet Sofíu Larsen og Mariu Vesturdal.
Tær ganga báðar í NámX í Eysturskúlanum, og á Dímunargarði hava tær verið óførar at hjálpt til við tí dagliga, sum er at gera á einum garði.
- Tær hava eitt nú verið í fjósinum morgun og kvøld; tær hava arbeitt við skinnum, og tær hava eisini tikið røtur upp.
Á Facebook-síðuni hjá Dímunargarði takka tey fyri hjálpina, sum starvsnæmingarnir hava veitt á garðinum hesar tvær vikurnar, samstundis sum teimum verður ynskt alt tað besta.
- Túsund takk fyri, at genturnar kundu koma í starvslæru hjá tykkum. Eitt upplivilsi fyri lívið, verður skrivað á tráðnum hjá Dímunargarði.
##med2##
Á sama tráði lesa vit eisini eina aðra heilsu til tey á Dímunargarði, nú starvsvenjingin í Stóru Dímun hjá Elisabet Sofíu Larsen og Mariu Vesturdal er liðug.
- Takk fyri, at tær kundu koma á garðin at arbeiða. Vit hava fingið eina vælnøgda damu heimaftur.
Vit kunnu leggja aftrat, at fyri sløkum ári síðan vóru tveir næmingar úr Klaksvík eisini á Dímunargarði í starvsvenjing.
##med3##
