Tað er løgið, at Klaksvíkar Kommuna í fjølmiðlunum boðar frá, at fólk verða flutt í onnur størv, uttan at hesi størv eru lýst leys, og tí fara vit nú at kanna, hvussu fram er farið í samband við bygnaðarbroytingarnar í umsitingini hjá Klaksvíkar kommunu.
Tað sigur sigur Selma Ellingsgaard, forkvinna í Starvsmannafelagnum, við Norðlýsið.
Tað var tann 14. september, at býráðið í Klaksvík boðsendi lokala fjølmiðlinum, Norðlýsinum, á tíðindafund, har borgarstjórin og ein ráðgevi frá »2improve« løgdu nýggja bygnaðin fram fyri blaðstjóranum á Norðlýsinum. Hinir miðlarnir fingu eina »kunning« frá Gunvá við Keldu sendandi í telduposti nakrar tímar seinni. Sambært Norðlýsinum høvdu starvsfólkini fingið somu kunning sama fyrrapart.
Nú er komið fram, at henda sama fríggjadag, sum býráðsleiðslan kunnar pressuna, høvdu deildarleiðararnir munnliga fingið at vita, at teir skuldu flytast í annað starv, og sum skilst kom hetta ógvuliga óvæntað, skrivar Norðlýsið, og tað undrar Selmu Ellingsgaard, sum nú fer at kanna málið nærri.
