Líka síðani føroyingurin fyrst ferð hoyrdi um ætlanina - ella donsku krøvini - at seta eina kvotuskipan í gildi ger á landi, hevur Heini O. Heinesen staðið í huganum hjá føroyingum sum kappin, sum skuldi syrgja fyri, at vit ikki fingu handilskvotur her á landi.
Men týsdagin - 10 ár eftir at múrarnir millum Eystur og Vestur rapaðu - mátti hann krúpa til krossin. Ja, hann mátti vegna Tjóðveldisflokkin staðfesta, at fiskidagarnir og veiðiloyvini vóru longu frítt umsetilig her á landi, og tí var einki at gera.
Føroyingar sótu sum kánus. -Hevur onkur - kanska Fólkaflokkurin - lumpað formannin í Tjóðveldisflokkinum og sníkt frítt umsetiligar fiskidagar niður yvir okkum á miðjari nátt, meðan Heini hevur sovið sín søta blund norðuri á Gili í Kunoy?
Ella hevur hesin varðhaldsmaðurin hjá førosyka útróðrarmanninum snorksovið, meðan fiskimálaráðgharrarnir í Fólkaflokkinum hava "lumpað og lirkað" frítt umsetilig veiðiloyvi gjøgnum okkara høga ting?
Øll minnast, hvussu Heini lovaði bál og brand, tá Frøjanes-málið fylti tíðindasendingarnar og breddarnar á bløðunum. Hetta var ímóti lógini, og vóru ivamál, so skuldu tey beinast av vegnum alt fyri eitt. Nú skuldi ruddast upp, men enn er formaðurin í Vinnunevndini ikki farin at rudda.
- Hevur Fólkaflokkurin einaferð afturat lumpað Heina í Kunoy? Skuldi ikki uppskot um broytingar leggjast fram tíðliga í heyst. Broytingaruppskot er einki komið! Afturímóti kom Caragata-álitið nú um dagarnar. Og Caragata mælir til størri umsetiligheit í fiskivinnuni. Hevur nú onkur eisini lumpað Caragata, og sagt, at vit hava ikki fría umsetiligheit, sum teir jú mæla til, men sum vit kortini hava sambært Heina O. Heinesen.
Lógin um vinnuligan fiskiskap er fløkt. Í øllum førum er lógin, sum setir upp karmarnar fyri okkara fiskivinnu, so ógreið, at hvørki formaðurin í Vinnunevnd Løgtingsins og stórir partar av Føroya fólki vita, hvussu umsetilig fiskidagaskipanin og veiðiloyvini eru.
Hetta ljóðar skemtiligt, men hetta er í grundini ein sorgarsøga. Fiskivinnan er okkara høvuðsvinna, og tað er neyðugt, at breið politisk semja er um, hvussu vit skipa okkara høvuðsvinnu, so grundhugsjónin ikki broytist alt eftir, hvør situr í landsins stýri. Og tí er tað heldur ikki gott politiskt handalag, at semjur verða gjørdar - uttan pappír - og uttan at floksformaðurin í landsins størsta flokki er við.
