Seint seinnapartin í dag fór vælmannað løgreglulið í Vágar, tí fráboðan var komin haðani um at koma vestur at taka sær av einum tilkomnum manni, sum var illa fyri sálarliga.
- Vit fóru vælmannað í Vágar - níggju løgreglufólk tilsamans - men í Vágum gekk alt tíbetur friðarliga fyri seg. Tá slíkar hendingar eru, er lækni sjálvsagt við, og tað kann taka sína tíð at avgreiða eitt slíkt mál.
Vaktleiðarin á løgreglustøðini sigur, at maðurin nú er komin undir læknahond á Landssjúkrahúsinum, har hann í hesum førinum er tvangsinnlagdur.
- Einki er hent, og alt tørnaði væl út. Nú er bara at vóna, at tilkomni maðurin fær hjálp fyri sína sálarstøðu, leggur vaktleiðarin aftrat.
