Fólk úr øllum fakbólkum umframt hópin av øðrum áhugaðum vóru møtt í Miðlahúsinum mánakvøldið, tá Sinnisbati hevði valt at varpa ljós á happing í sambandi við at 10. oktober var Alheimsdagur fyri Sálarheilsu.
Fyrilestrar og kjak
Eftir eina røð av áhugaverdum fyrilestrum, sum viðgjørdu happing út frá ymsum sjónarhornum, vóru spurningar og kjak á skránni. Breið semja tóktiskt vera um, at happing átti at verið bannað við lóg eins, og tað til dømis er í Svøríki.
Víst varð á, at tað er ikki nokk at lata lærarar fara á skeið og fáa eftirútbúgving, so teir betri eru førir fyri at handfara happing. Tryggjast má eisini, at neyðuga tímatalið verður sett av, so lærarar fáa gjørt nakað munagott í flokkunum fyri at forða happing.
Soffi Egholm fegnast um stóra áhugan fyri tiltakinum, sum bara hevur styrkt fatanaina hjá Sinnistbata av, hvussu umfatandi trupulleikin við happing í grundini er í Føroyum. Næsta stigið hjá felagnum verður at seta ein arbeiðsbólk, ið fer at arbeiða fram ímóti, at ítøkiligar mannagongdir verða settar í verk á skúlum kring alt landið.
