Niðurteljingin til ársins fyrsta av í alt fimm undankappingardystum er av álvara farin á glið. Skotska landsliðið kemur til Føroya við Atlantic Airways hósmorgunin klokkan 10.
Liðið hjá Craig Brown fer at halda til á Hotel Føroyum, og longu seinnapartin klokkan hálvgum fimm skulu teir venja í Gundadali. Har fara teir eisini at venja fríggjadagin klokkan ellivu, og sambært skránni, sum skotska fótbóltssambandið hevur sent til FSF, so ætla teir sær ikki inn á Svangaskarð at venja á grasvøllinum eitt samdøgur undan sjálvum dystinum. Hetta plagar annars at vera vanligt, og tá skotar fyri fýra árum síðani vóru í Føroyum, vandu teir á Svangaskarði kvøldið fyri sjálvan dystin. Tá var venjarin tann sami, sum er nú, og hann heldur kanska, at tað er óneyðugt at koyra so langan tein, tá hann og onkrir av spælarunum kenna umstøðurnar á Svangaskarði.
Dupult umfar
Dysturin verður komandi leygardag klokkan 17, og skotar gera skjótt av í Føroyum. Teir fara beinleiðis av Svangaskarði og vestur í Vágar, og flogfarið hjá Atlantsflog lættir úr Vágum klokkan 22, og ein tíma seinni eru teir aftur í Glasgow.
Skotar síggja í álvara upp á uppgávuna í Føroyum, men tað er einki at taka seg aftur í, at tað verður til ta størru uppgávuna, at teir fara at fyrireika seg, tá teir eru komnir aftur úr Føroyum og til Glasgow. Teir skulu spæla í Prag mikudagin í aðru viku. Hagar fara teir úr Glasgow mánamorgunin klokkan tíggju, men longu sunnudagin klokkan 17.15 er ætlanin, at teir skulu venja á Hampden Park í Glasgow. Hvussu lagið verður tá, verður ikki minst treytað av, hvussu teir fara at standa seg í Føroyum, og teir halda sjálvir, at ferðin til Føroya verður væl eydnað, um teir fáa trý stig. Tað hevur minni at siga, hvussu tað verður við støddini á sigrinum.
Langur hali
Áhugin fyri undankappingardystinum á Svangaskarði komandi leygardag er stórur í Skotlandi. Tíðindamenn frá skrivaða pressuni hava longu hingið í telefonini í fleiri dagar fyri at frætta tíðindi frá føroysku leguni, og í flogfarinum saman við landsliðshópinum koma umleið fjøruti tíðinafólk:
22 tíðindamenn frá skrivaða partinum av pressuni, sjey frá sjónvarpsstøðini Channel 5, sum skal senda beinleiðis frá dystinum, ein útvarpsmaður frá kendu BBC Radio 5 støðini, tveir útvarpsmenn frá BBC Radio Scotland og so seks myndamenn.
Tá skotar vunnu 2-0 á Svangaskarði mikudagin 7. juni í 1995 vóru millum tvey og trý hundrað skotskir áskoðarar og hugdu at. Nakrir áskoðarar koma úr Skotlandi hesa ferð, men talan verður ikki um so nógvar sum fyri fýra árum síðani. Ta ferðina komu teir flestu við Smyrli, men sum kunnugt er høvuðssambandið til bretsku oyggjarnar tikið burtur síðani tá.
Hópurin
Craig Brown hevur tikið 23 spælarar út til teir báðar dystirnar á útivølli. Í vikuni hevur nógv verið tosað og skrivað í skotsku pressuni um, hvørjir ellivu spælarar hava staðið seg so væl í landskappingini, at teir hava uppiborið at komið á tað, teir kalla ársins lið. Landsliðsvenjarin hevur givið sítt boð. Tað er bara møguleiki fyri at velja millum spælarar, sum hava spælt í skotsku landskappingini ? og tað vil siga, at útlendngar í Skotlandi kundu koma uppá tal, meðan skotar, sum t.d. hava spælt í Onglandi, ikki kundu koma uppá tal.
Landsliðsvenjarin duldi í sínari útveljing ikki fyri, at nakrir av bestu spælarunum í Skotlandi í farna kappingarárinum hava verið útlendingar. Eitt nú hevði hann fegin ynskt, at svenski Henrik Larsson, sum spælir í Celtic, hevði eitt sindur av skotskum blóði í æðrunum. Sum kunnugt nýtast ættarbondini til Skotlands ikki at vera so ógvuliga sterk fyri at koma á landsliðið har. Tað er eitt nú Neil Sullivan, málverjin hjá Wimbledon, sum í oktober vardi málið móti Føroyum, eitt gott dømi um.
Málverjar: Robert Douglas, Dundee United 0 landsdystir/0 mál, Jonathan Gould, Celtic 0/0 og Neil Sullivan, Wimbledon 6/0.
Verja: Tom Boyd, Celtic, 63/1, Colin Calderwood, Aston Villa, 32/1, Matt Elliot, Leicester City, 6/0, Colin Hendry, Glasgow Rangers, 39/1, Paul Ritchie, Heart of Midlothian 1/0, David Weir, Everton, 11/0 og Derek Whyte, Aberdeen, 12/0.
Miðja: Craig Burley, Celtic, 30/3, Colin Cameron, Heart of Midlothian, 1/0, Callum Davidson, Blackburn Rovers, 5/0, Ian Durrant, Kilmarnock, 14/0, Scott Gemmill, Everton, 14/0 og Paul Lambert, Celtic, 18/0.
Álop: Billy Dodds, Dundee United, 7/3, Kevin Gallacher, Blackburn Rovers, 41/8, Eoin Jess, Aberdeen, 16/2, Allan Johnston, Sunderland, 4/0, Neil McCann, Rangers, 2/0 og Robbie Winters, Aberdeen, 1/0.
