Kendi rógvari Livar Nysted hevur boðað frá á Facebook síðu sínari, at hann ætlar sær at rógva einsamallur frá Grand Canaria til Antigua í Caribien – vónandi í 2020. Áður hevur hann mangan ró langar teinar við øðrum, men hesaferð ætlar hann sær at gera tað einsamallur.
- At gera tað einsamallur er tað ultimativa. Sjálvandi fái eg hjálp frá nógvum í fyrireikingunum, men tá eg siti við árunum so er tað bara eg, og eg má taka allar avgerðirnar sjálvur, sigur Livar Nysted í morgun.
Les eisini: Livar skal rógva einsamallur í fýra mánaðir
Og tann størsta einstaka avbjóðingin er uttan iva, at Livar skal vera isoleraður frá øðrum fólki í tríggjar, fýra mánaðir.
- Eg komi at hava telefonsamband so eg kann ringja heim, men tú hevur ikki nakra samrøðu við nakran, sum situr frammanfyri tær. Tú ert einsamallur mitt úti á havinum. Tað verður ein avbjóðing, men eg trívist væl í mínum egna selskapi, sigur Livar Nysted.
Leiðin frá Grand Canaria til Antigua er merkt av orkanum í ávísum tíðarskeiðum av árinum og tí ræður um at velja rætta tíðspunktið at leggja frá landi.
- Um eg klári at vera liðugur við alt fyrireikingararbeiðið áðrenn januar í 2020, so fari eg tá. Man er noyddur at leggja túrin eftir orkansesongini, so tað skal vera í januar ella har á leið, sigur Livar Nysted, sum nú fer undir fyrireikingararbeiðið – tað verði seg bæði kropsliga, fíggjarliga og tá umræður neyðuga útgerð.
