Tað var stýrimaðurin umborð á Hans á Bakka, Martin Smith, sum býr í Havn, ið fekk fulla plátu í gekka-spælinum í kvøld og slapp at snara hjólinum.
Hans á Bakka liggur í løtuni á Glyvrum og bíðar eftir betri líkindum.
Martin Smith fortaldi gekka-vertinum í kvøld, Magnusi Magnussen, at teir eru seks mans umborð í senn, og teir eru tríggjar vikur umborð í senn.
- Hetta er eitt deiligt skip, og skipið roynist væl, legði hann aftrat.
Høvuðsvinningurin í gekka-spælinum í kvøld á 200.000 krónur, og Martin Smith valdi at koyra alla upphæddina í bláa leypin.
Í fyrstu royndini steðgaði hjólið á 12.500 krónum, í aðru royndini á 15.000 - og í triðju og seinastu royndini steðgaði hjólið á 10.000 krónum, sum gjørdist vinningurin hjá Martini Smith í kvøld.
- Men, 10.000 krónur er gott at fáa á frívaktini í kvøld, helt verturin, Magnus Magnussen, fyri. Og her var stýrimaðurin umborð á Hans á Bakka ikki ósamdur.
- Ja, tað er saktans gott, segði hann og takkaði fyri.
