Tjóðveldið, sum hevur størstu framgongdina í veljarakanningini hjá Gallup, fær atkvøður frá Fólkaflokkinum og frá Framsólkn.
Sambært »vandringsmarkisuni« fær Tjóðveldi seks atkvøður frá Fólkaflokkinum og fýra frá Framsókn.
At so stórur partur av fólkafloksveljarum fara til Tjóðveldi kann hugsast, at talan er um tjóðskaparligar veljarar hjá Fólkaflokkinum, sum vilja geva flokkinum gula kortið, tí flokkurin er í samgongu við Sambandsflokkin.
Vit hava sæð fyrr, at Fólkaflokkurin liggur lakari í veljarakanningum, enn hann ger á valinum. Hetta kann vera, tí at veljarar á hendan hátt revsa flokkin, men kortini venda aftur, tá veruliga á stendur.
Men at flokkurin eisini fær nógvar atkvøður frá Framsókn kann skyldast, at Janus Rein er farin úr flokkinum.
Veljarakanningin er gjørd, áðrenn Janus Rein meldaði seg í Fólkalfokkin. Men á valinum var Janus Rein, um vit so kunnu siga, »tjóðveldisprofilurin« og Poul Michelsen »fólkafloksprofilurin«. Tá Tjóðveldi gekk so nógv aftur á seinasta vali, so kann hugsast, at tjóðveldisveljarar, sum valdu Framsókn, eru farnir aftur til Tjóðveldi.
Vandringsmarkisan vísir, at Framsókn fær veljarar frá Fólkaflokkinum, men missir veljarar aftur til Tjóðveldi
Næststørstu framgongdina hevur Javnaðarflokkurin.
Sambært vandringsmatrisuni, so fær flokkurin nógv tær flestu nýggju atkvøðurnar frá Sambandsflokkinum – 18 sambandsveljarar frá síðsta vali, siga seg hesaferð velja Javnaðarflokkin.
Her kann hugsast, at ávísur partur av sambandsveljarunum eru ónøgdir við, at Sambandsflokkurin er í samgongu við Fólkaflokkin – bæði tí at talan er um ein fullveldisflokk, men eisini tí, at Fólkaflokkurin hevur so stórt vald á Sambandsflokkinum og formar borgaliga politikkin, soleiðis at sosial-liberali profilurin, sum eitt nú Edmund Joensen stóð fyri, kámast burtur. Fleiri sambandsveljarar ynskja heldur gomlu heimastýrissamgonguna við Javnaðarflokkin og Sjálvstýrisflokkin heldur enn eina borgarliga samgongu.
