Stórar broytingar

Samstundis sum talan er um størstu kappingina nakrantíð, eru eisini fleiri broytingar gjørdar. Onkur teinur er dottin út og onkur annar komin í staðin, umframt at onkur teinur hevur skift kappingardag. Hartil eru so eisini broytingar á teim­um ymsu teinunum, hóast hesar broytingar samanlagt ikki eru størri enn so, at kappingin fram­vegis líkist sær sjálvari og er á leið líka krevjandi, sum hon hevur verið.
Framvegis er talan um tilsamans yvir 330 kilometrar, ið skulu súkkl­ast hesar dagarnar, og sum van­ligt eru tveir dagar við stytri einkults­startum og so tríggir dagar við longum teinum, sum tveir av døg­unum eru yvir 100 kilometrar. Mill­um undantøkini eru tó, at motion­istarnir onkrar av døgunum hava eitt sindur stytri tein enn hinir súkklararnir.
Niðanfyri er eitt yvirlit yvir allar fimm kappingardagarnar, og har er eisini viðmerkt, hvat er øðrvísi enn undanfarin ár.

Mikudagin 21/7
Sum vanligt byrjar kappingin við pro­logi í Klaksvík. Teinurin, sum er einkultstartur, er umleið átta kilo­metrar til longdar, og súkklað verður frá gomlu ferjuleguni á Stong­unum og nakað norður um Ánir­nar, har vent verður og so aftur súkklað á ferjuleguna. Startur er klokk­an 18, og sigurshald verður vænt­andi klokkan 19.

Hósdagin 22/7
Eysturoyarteinurin er broyttur mun­andi, tí nú verður byrjað á Vagl­inum í Havn, og komið verður bein­leiðis á mál á Glyvrum, uttan at súkklast skal runt Agnið. Teinurin er um­leið 110 kilometrar, og súkklað verður úr Havn og norðureftir – ígjøgn­um bæði Kaldbakstunnilin og Norð­skálatunnilin, ið eisini krevja, at súkklararnir hava ljós á súkkl­unum – og síðani verður farið til Selatraðar at venda, áðrenn komið verður á mál við Glyvra skúla. Startur er klokkan 13, og sigurshald verður væntandi klokkan 17.30.

Fríggjadagin 23/7
Aftur her er talan um broyting, tí hini árini hevur Suðuroyarteinurin verið leygardag, men fyri ikki at hava ov nógva spilltíð, er hesin teinur nú lagdur fríggjadag. Til­sam­ans er talan um ein 75 kilometra langan tein, ið byrjar við Føroya Banka á Tvøroyri. Síðani verður súkklað til Fámjins og víðari suður­eftir umvegis Hovsegg til Sumbiar umvegis Hestin og aftur til Vágs, har málið er við Torgið. Startur er klokkan 16, og sigurshald verður væntandi klokkan 18.30.

Leygardagin 24/7
Her er talan um størstu broytingina, tí seinni einkultstarturin í kapp­ingini hevur hini árini verið í Sand­oynni, sum nú verður ofrað, tí vandi í fleiri førum hevur verið fyri ferðslu­trygdini hjá súkklarunum. Nú er hann fluttur í Vágar, sum eru við fyri fyrstu ferð. Talan er um ein 30 kilometra tein, ið gongur úr Sanda­vági til Bíggjar og aftur til Sanda­vágs. Startur er klokkan 11, og sigurs­hald verður væntandi klokkan 13.

Sunnudagin 25/7
Teinurin í Streymoynni er stórt sæð óbroyttur, burtursæð frá mál­inum, sum nú verður við Gamla Apotek í miðbýnum í Havn, so tí verða heldur ikki súkklað fleiri um­før inni í Havnini. Teinurin er umleið 109 kilometrar til longdar, og farið verður úr Tjørnuvík um­vegis Saksun og Oyggjarvegin til Havnar, har hildið verður fram á Gomlurætt, har súkklararnir venda og fara aftur til Havnar og síðani eftir Ringvegnum úti við Strond og niðan ímóti Vaglinum. Startur er klokkan 14, og sigurshald verður væntandi klokkan 18.