- Vit stúra fyri álopinum frá politikarum og privatfólki á frælsið hjá føroyskum fjølmiðlum.
Tað sigur Thomas Spence, formaður í Norðurlendska felagnum fyri miðlafólk.
Felagið fyri norðurlendsk fjølmiðlafólk hevur havt fund, og har staðfesta tey, at Føroyar eru eitt lítið samfelag, og at tað setir serlig krøv til allar partar um at vera professionellir og óheftir í sínum virki.
Men hinvegin er Felagið fleiri ferðir gjørt varugt við, at politiski myndugleikin í Føroyum hevur lagt trýst á fjølmiðlarnar og at bæði fjølmiðlafólk og leiðslur í miðlum, eru hótt.
Felagið stúrir eisini fyri gongdini, har fólkavaldir politikarar brúka løgtingsins røðarapall til at sáa illgruna um miðlarnar og leiklut teirra í einum opnum, fólkaræðiligum samfelagi. Eitt, tey sipa til, er, at Jørgen Niclasen stevndi fjølmiðlafólki í nógv umrødda Tollmálinum, heldur enn brúka vanliga mannagongd og kæra til Fjølmiðlanevndina.
Men hann tapti rættarmálið og slapp ikki í Hægstarætt og sostatt eru miðlafólkini fríkend. Men kortini verður hildið fram um at sáa illgruna um miðlafólkini, staðfestir Felagið fyri norðurlendsk fjølmiðlafólk.
Felagið staðfestir somuleiðis, at tað stuðla føroyskum miðlafólkum í arbeiðnum fyri etiskum, atfinningarsamum og frælsum fjølmiðlum, og mæla samstundis staðiliga føroyskum politikarum til at virða uppgávuna og óheftnið hjá miðlunum.
