Í hesi øldini fer fólkatalið í heiminum at koma í hæddina og síðani fella niður á eitt nógv lægri støði enn higartil hildið.
Tað vísir ein nýggj frágreiðing frá ST, sum kom hósdagin, og sum gevur eina ábending um gongdina í heimsins fólkatali.
Orsøkin er millum annað, at barnsburðarstøðið fer at falla í nøkrum av heimsins størstu londum - til dømis Kina, sigur Li Junhua, sum er varaaðalskrivari í ST.
- Demografiska landslagið hevur ment seg nógv seinastu árini, sigur hann.
Núverandi fólkatalið á jørðini á 8,2 milliardir fólk fer at vaksa til í mesta lagi 10,3 milliardir miðskeiðis í 2080-árunum og minka síðani til 10,2 milliardir áðrenn ár 2100.
Í 2100 verður sostatt seks prosent - ella 700 milliónir fólk - færri enn ST hevði roknað í somu frágreiðing frá 2013.
Frágreiðingin frá 2013 kom eisini til ta niðurstøðu, at talið av fólki á jørðini ikki fór at minka hesa øldina.
Men tær forsøgnirnar eru broyttar.
Sambært Li Junhua er gongdin eitt gott tekin um alheimsupphitingina, at fólkavøksturin kemur í hæddina fyrr enn væntað - so verður kurvan brotin.
- Færri fólk, sum skapa minni samlaða nýtslu, fara at merkja minni trýst á umhvørvið. Tað tekur tó ikki burtur tørvin á at minka um miðalávirkanina frá einstaklingum, sigur hann.
Ein fjórðingur av heimsins íbúgvum býr í londum, sum eru komin í hæddina á fólkatalskurvuni. Hetta er galdandi fyri 63 lond so sum Kina, Russland, Japan og Týskland.
Kurvan fer væntandi eisini at knekka í 50 øðrum londum næstu 30 árini. Hetta er galdandi fyri millum annað Brasil, Iran og Turkaland.
Men fólkatalið fer framhaldandi at vaksa í 120 londum eftir 2054. Hetta er millum annað galdandi fyri India, Indonesia, Nigeria, Pakistan og USA, skrivar ST í frágreiðingini.
/ritzau/afp/
