Formaðurin í Sambandsflokkinum tekur undir, at Føroyar verða eitt valdømi longu til komandi løgtingsval. Tað kann enda við nývali Kaj Leo Johannesen, formaður í Sambandsflokkinum, tekur undir við at skipa Føroyar sum eitt valdømi longu til komandi løgtingsval.
Tað samsvarar ikki við avtaluna, sum teir tríggir samgonguflokkarnir hava gjørt um sama mál, og støðutakanin hjá Kaj Leo Johannesen kann viðvirka til, at løgtingsval verður útskrivað.
Kaj Leo Johannesen segði við Kringvarpið í dag, at tað ikki var ein avtala, tí illa ber til at tvinga nakran at atkvøða eitt ávíst. Hann segði, at í samgonguni er stór ósemja um fleiri mál, og at í hesum føri fara tinglimirnir at atkvøða eftir sínari sannføring - eisini hann sjálvur.
Jóannes Eidsgaard, løgmaður, sigur, at nýggja støðan kann fáa avleiðingar fyri samgonguna. Broytingaruppskotið varð gjørt fyri at fáa eina semju og arbeiðsføri í samgonguni. Men, sjálvandi, ongin kann tvinga nakran.
Løgmaður heldur, at eftir øllum at døma er loysnin við broytingaruppskotinum sera viðbrekin. Hann ýtihýsir ikki nývali, men vil bíða eftir at vita, hvørjar avleiðingar viðgerðin fær fyri samgongugrundarlagið.
Atkvøðugreiðslan verður í Tinginum týsdagin.
