Í kvøld klokkan 18 spæla HB og KÍ kvinnurnar steypafinalu.
Tølini siga, at tað hevur verið hips um haps, tá ið hesi bæði liðini hava dystast í finaluni í steypakappingini.
Steypakappingin hevur verið á skrá hvørt ár síðani 1990. HB og KÍ hava sjey ferðir kappast í steypafinaluni. KÍ hevur vunnið fýra ferðir, og HB hevur vunnið tríggjar ferðir.
Fyrsta ferðin, at 112 ára gomlu javnaldrandi feløgini stríddust í finaluni var í 1996, tá ið HB vann 3-1.
Onnur ferðin var í 1999. Tá var tað øgiliga tætt og spennandi. Miðskeiðis í seinna hálvleiki legði HB seg framum 3-1, men KÍ svaraði aftur, og tá ið dómarin bríkslaði fyri síðstu ferð eftir vanliga leiktíð, var tað 3-3.
So var neyðugt við longdari leiktíð, og tá skoraði HB sigursmálið til 4-3.
Fyrsta árið yvirhøvur, at KÍ vann steypakappingina hjá kvinnum var í 2000. Eftir at hava tapt tvær finalur ímóti HB eydnaðist tað endiliga KÍ at vinna á arvafíggindanum. Úrslitið var 2-0.
Árið eftir – í 2001 – takkaði HB fyri seinast. Talan var aftur um sera tætta og spennandi finalu. Eftir vanliga leiktíð var støðan 3-3. So var neyðugt við longdari leiktíð, men tað segði tað sama. Brotssparkskappingina vann HB 5-4. HB umsetti øll fimm brotsspørkini til mál, meðan KÍ misnýtti eitt brotsspark.
Tvey tey næstu árini vóru KÍ og HB aftur í finaluni, og KÍ vann bæði í 2002 og 2003. Fyrra árið var sigurin so ruddiligur sum 6-1, meðan talan í 2003 var um 2-1 sigur.
Í 2014 stóðu KÍ og HB kvinnurnar aftur andlit til andlit í finaluni. Hóast munurin á liðunum í landskappingini var rættiliga stórur, so varð steypafinalan sera spennandi. KÍ vann FM nítjan stig frammanfyri HB, sum vann bronsu. Innanhýsis dystirnir í Gundadali vann KÍ 7-1 og 7-2, og í Klaksvík endaði tað við 5-1 heimasigri.
Í steypafinaluni vann KÍ 1-0. Tað var ikki fyrr enn í tíðini, sum dómarin hevði lagt aftrat, at Hervør Olsen skoraði sigursmálið!
Steypafinalur millum KÍ og HB kvinnur
1996 HB-KÍ 3-1
0-1: Sólvá Eystberg 2.
1-1: Sigrun Mikkelsen 26.
2-1: Ann Hansen 39.
3-1: Helga Ellingsgaard 78.
1999 HB-KÍ 4-3 eftir longda leiktíð
1-0: Eyðfríð Kristiansen 40.
1-1: Malena Josephsen 45.
2-1: Hlega Ellingsgaard 50.
3-1: Eyðvør úr Dímun 54.
3-2: Malena Josephsen 65.
3-3: Rannvá B. Andreasen 75.
4-3: Eyðvør úr Dímun 100.
2000 HB-KÍ 0-2
0-1: Una Olsen 32.
0-2: Rannvá B. Andreasen 85.
2001 HB-KÍ 3-3 5-4 í brotsspørkum
0-1: Bára Klakstein 14.
1-1: Vivian Unadóttir 18.
2-1: Helga Ellingsgaard 54.
2-2: Malena Josephsen 76.
3-2: Helga Ellingsgaard 81.
3-3: Bára Klakstein 87.
2002 HB-KÍ 1-6
0-1: Elsa Maria Simonsen 1.
0-2: Bára Klakstein 7.
0-3: Rannvá B. Andreasen 22.
1-3: Ása úr Dímun 33.
1-4: Vivian Bjartalíð 57.
1-5: Malena Josephsen 62.
1-6: Rannvá B. Andreasen 75.
2003 KÍ-HB 2-1
1-0: Rannvá B. Andreasen 55.
2-0: Malena Josephsen 75.
2-1: Eyðfríð Kristiansen 78.
2014 HB-KÍ 0-1
0-1: Hervør Olsen 92.
www.faroesoccer.com
