- Heimurin er á veg inn í eitt tíðarskeið við kaos, ávarar ST-aðalskrivarin, António Guterres, í røðu á fundi í ST í dag.
Her sló hann fast, at ST-trygdarráðið er syndrað og virkislamið. Hetta er hent áður, men ST-aðalskrivarin heldur, at støðan nú er meira álvarslig.
António Guterres segði, at neyðugt er við "mekanismum", sum kunnu greiða viðurskiftini millum stórveldini.
ST-aðalskrivarin vísti til stríð, sum spjaðir seg, samstundis sum tørvurin á humaniterari hjálp er størri enn nakrantíð.
Í røðuni ávaraði hann eisini um veðurlagsbroytingar og vandar, sum kunnu standast av vitlíki - ella tí, sum verður rópt "kunstig intellegens".
Hann helt eisini, at neyðugt er við einari nýskipan av trygdarráðnum, eins og hann heitti á Ísrael og Hamas um vápnahvíld og leyslating av gíslunum í Gazageiranum.
Tíðindastovan NTB veit at siga, at António Guterres í september fer at skipa fyri einum "framtíðartoppfundi" at umrøða avbjóðingar, sum heimurin stendur yvirfyri.
