Framsýningin hjá Øssuri Mohr lat upp 14. novembur, og frá Randi Ottosen, eigara av Landsby Galleriet frætta vit, at málningarnir hjá Øssuri taka seg sera væl út í gallerínum. Rættiliga nógv fólk hava vitjað framsýningina, umframt at lokalu útvarpsrásirnar og bløðini hava sýnt henni stóran áhuga.
Føroysk list sum siðvenja
Landsby Galleriet í Timring lat upp í 2002, og hevur væl og virðiliga fingið fótafesti í danska galleríheiminum. Eigarin, Randi Ottosen, hevur allatíðina lagt seg eftir at hýsa bæði viðurkendum og nýggjum listafólkum, og beint nú er hon í ferð við at leggja eina afturvendandi árliga føroyska framsýning til rættis.
Áhugan fyri føroyskari list hevur Randi Ottosen eftir pápan, sum hevið galleríð "M" í Keypmannahavn, har hann í 60-70unum gjørdi tað til siðvenju javnan at hava føroyskar listaframsýningar. Tað er hesa siðvenju Randi Ottosen nú tekur upp aftur og í løtuni leitar hon eftir áhugaverdum føroyskum listafólkum til næstu árligu føroysku framsýningina, sum letur upp í novembur næsta ár. So um onkur føroyingur hevur áhuga, er bara at lata frætta frá sær, sigur Randi Ottosen, sum eisini starvast sum listaummælari á Kunsavisen.
Framsýningin hjá Øssur í Landsby Galleriet er opin til 9.januar 2005
