Marita Gulklett, sum hevur stóran áhuga fyri náttúru og fuglalívi og sum er kona Jens-Kjeld Jensen í Nólsoy, spyr á sínari Facebook-síðu, hvør ruddar inni á Sundi.
- Alt gott um rudding í náttúruni, sum átti at verið ein sjálvfylgja og serliga, tá fyritøkur standa fyri dálkingini.
Marita Gulklett vísir á, at seinasta vár vóru nógvir útlendskir lívfrøðingar í Føroyum, og tá teir sóu allan spreingitráðin, vóru teir sannførdir um, at spreingitráður fór at síggjast aftur í fuglareiðrum í ár.
- Nú um páskirnar sá eg myndarøð av einum ravnareiðri, har spreingitræðrir stungu út millum alt hitt tilfarið. So, nú ber fuglurin spreingitráðin út í hagan.
Marita Gulklett sigur seg ikki ivast í, at nógvir aðrir fuglar, sum annars ríka okkara náttúru, fara at gera tað sama, og tað heldur hon er ógvuliga keðiligt.
