Í dag er Svitzer Tyr, sleipibátur frá svenska reiðarínum Svitzer skrásettur í føroysku altjóða
skipaskrásetingini FAS. Næstu vikurnar fer reiðaríið ætlandi at skráseta 9 skip afturat. Eigari av Svitzer Tyr, eins og teimum komandi skipunum, er P/f Svitzer Faroe Islands, ið er partur
av stóra danska A. P. Møller - Mærsk samtakinum. Umboð fyri Svitzer vóru við á kunningar-
fundinum, sum FAS skipaði fyri á Norðuratlantsbryggjuni í Keypmannahavn í feb. 2009. Síðani tá
hevur tætt samband verið við reiðaríið, og skal skrásetingin av Svitzer Tyr og teimum komandi
skipunum síggjast sum úrslitið av hesi drúgvu tilgongd.
Umboð fyri FAS fara í komandi mánaða til Svøríkis, har tey skulu luttaka á stórari shippingstevnu
Donsø Tanker Meet. Stevnan verður hildin á lítlu oynni Donsø, sum liggur í skergarðinum uttanfyri
Gøteborg. Oyggin hevur bert 1500 íbúgvar, men er heimstaður hjá eini 10 smærri og miðalstórum
reiðaríum, sum flest øll hava tangaskip.
Á FAS hava tey góðar vónir til stevnuna, bæði tá tað kemur til at røkja verandi kundar og at knýta
nýggj sambond. Væntandi kemur landsstýrismaðurin í fiskivinnu- og vinnumálum Johan Dahl eisini
at vitja á Donsø hesar dagarnar, umframt at umboð fyri føroysku shippingvinnuna eisini luttaka.
