Um dagarnar kom út grein um føroysk børn í tíðarritinnum American Journal of Clinical Nutrition (2014;99:5–13).
Greinin hevði heitið "Association between prenatal polychlorinated biphenyl exposure and obesity development at ages 5 and 7 y: a prospective cohort study of 656 children from the Faroe Islands".
Fólkaheilsuráðið sigur, at á føroyskum merkir heitið nakað soleiðis: "Samband millum útsetilsi fyri polykloreraði bifenylir áðrenn føðing og fiti um 5 og 7 ára aldur: ein framlýtandi kohortu kanning af 656 børnum í Føroyum".
- Granslingararbeiðið varð framt á Deildini fyri Arbeiðs- og Almannaheilsu og snýr seg um okkara kohortu 3, sum var borðin í heim í tíðarskeiðinum frá november 1997 til mars 2000.
Tað var Ulrike Steuerwald, barnalækni, sum kannaði tey bæði, tá tey vóru fimm og sjey ár.
- Umframt at kanna miðnervalagið og immunskipanina vigaði hon tey og máldi hæddina og um miðjuna. Vit høvdu mált PCB og DDE í blóðinum hjá mammuni í 34. viku av viðgongutíðini og so eisini í móðirmjólk, 4-5 dagar eftir burðin.
Fólkaheilsuráðið vísir á, at virðini av PCB og DDE vóru rættiliga høg í mun til onnur lond, men hetta skyldast, at tá ótu summar kvinnur enn spik, sum var (og er) okkara stóra kelda til hesi eiturevni.
- Vit hava síðani tíbetur sæð eina stóra minking av hesum evnum í blóðinum hjá barnakonum í Føroyum, og tað skyldast fyrst og fremst, at tær fylgja ráðunum um ikki at eta spik.
Lagt verður aftrat, at nógv hevur verið tosað um, hví fiti og sukursjúka eru í so stórum vøkstri víða um heim.
- Sjálvandi spælir ríkiligur matur og likamsóvirkni sín stóra lut. Men hvat við dálkandi evnum, sum eru mannaskapt í okkrara tíð og fyrilitarleyst latin út í náttúruna?
Deildin fyri Arbeiðs-og Almannaheilsu hevur áður víst á, at hesi evni kunnu viðvirka til sukursjúku hjá sjeytiáringum.
- Nú síggja vit so, at eisini børn hjá mammum, sum í viðgongutíðini vóru prúðar, gjørdust í prúðara lagi í forskúlaaldri. Tað er hetta, sum vit nú greiða frá í hesi grein.
Niðurstøða hjá Fólkaheilsuráðnum er varislig og sigur úrslitini benda, at útsetilsi fyri PCB og DDE áðrenn føðing kann hava týdning fyri fiti seinni í lívinum.
- Gentur, hvørs mammur høvdu høgt BMI í viðgongutíðini, tykjast serliga ávirkaðar, sigur Fólkaheilsuráðið, sum mælir føroyingum til at eta meira fisk.
