Higar til hetta kappingarárið hevur Neistin vunnið allar tríggjar dystirnar á StÍF, og tí eiga tær uttan iva at roknast sum favorittar. Eisini tí tær hesa ferð hava munandi meira at spæla fyri, enn mótstøðuliðið úr StÍF hevur tað.
Hinvegin hevur StÍF givið Neistanum ávísar trupulleikar í spældu dystunum. Ikki minst seinastu uppgerðini millum liðini, har StÍF var á odda bert fáar minuttir fyri leiklok.
Tá var talan tó um eitt Neista-lið, sum var í djúpari kreppu, meðan tað síðani hetta bert hevur gingið framá. Og økta sjálvsálitið, saman við teirri støðu, at StÍF ikki verður vikað av sínum plássi á stigatalvuni, eigur uttan iva at bera við sær, at finalusessurin nú verður koyrdur heim.
VB til reiðar
Skuldi tað hent seg, at Neistin kiksar, so er tað uppgávan hjá VB at vera til reiðar. Tær spæla um vikuskiftið útidyst móti Kyndli, sum hevur togað seg nógv upp seinna partin av kappingini.
Til dystin hesa ferð er Kyndil tó skert, tí Guðrun í Lágabø er leikbannað, og tað eigur alt annað líka at geva VB ein fyrimun til dystin.
Seinasti dysturin er í Vestmanna, har longu niðurflutta VÍF tekur ímóti Stjørnuni, sum fyri nakað av tíð síðani vissaði sær sess í finaluni.
Vinna Neistakvinnurnar dystin á Skála sunnudagin, so eru tær partur av FM-finaluni í kvinnuhondbólti
Dystir um vikuskiftið
Hondbóltur
Sunset-kappingin
Dagur Klokkan Dystur
15.03 14.30 StÍF-Neistin
15.03 14.30 Kyndil-VB
15.03 14.30 VÍF-Stjørnan
Atlanti Airways-kappingin
15.03 16.00 StÍF-Neistin
15.03 16.00 Kyndil-KÍF
15.03 16.00 VÍF-H71
Flogbóltur
Meistaradeild kvinnur
15.03 14.00 ÍF-SÍ
15.03 15.00 TB-Mjølnir
