Spennandi umfar í SMS deildini í dag

Tríggir dystir verða leiktir í SMS-deildini í dag:

VÍF - StÍF klokkan 14.00 í Høllini í Vestmanna

Neistin - H71 klokkan 14.00 í Høllini á Hálsi (Beinleiðis á FM1)

Stjørnan - VB klokkan 15.00 í KÍ-Høllini.

VÍF liggur á fremsta plássi í SMS-deildini við betri málmuni enn H71, ið hevði ein sera ringan dag ímóti Kyndli seinasta sunnudag, har hoyvíkskvinnur máttu brúka 17 minuttir at skjóta fyrsta málið í einum dysti, ið Kyndil at enda vann 18-14.

VÍF er í dag rættiliga stórur favorittur ímóti StÍF í Vestmanna. Fyri júst einum mánaða síðani spældu liðini á Skála, har VÍF vann við 20 málum, men StÍF hevur síðani tá fingið Haruku Gima spælda inn á liðið saman við Yuiku Kuritmoto, og spurningurin er um triði japanski leikarin, Mao Otani, fær sín fyrsta dyst í dag.

VÍF má ansa sær, men eigur kortini ikki at koma í trupulleikar á heimavølli. Í staðin munnu vestmenningar vóna at Neistin fer at arga H71, ið vísti stórar veikleikar í álopinum seinasta sunnudag.

Neistaverjan hevur staðið sterk saman við Maju Dragobujlovic í álopinum, og fæst glið á álopið, kann Neistin spæla seg inn í oddastríðið í dag.

Klokkan 15.00 ætlar Stjørnan sær eisini at gera seg galdandi í stríðnum um fjórða plássinum, og klaksvíkingar munnu vóna at H71 vinnur á Neistanum, og at Stjørnan greiðir sína skyldu ímóti VB. Tá ið Stjørnan og VB dystaðust í Vági fyri tveimum vikum síðani vann Stjørnan við fimm málum.

Hoyr hvat Birgir Hansen metti um umfarið í hondbóltsprátinum í gjár við at trýsta HER

Støðan í SMS-deildini undan umfarinum í dag (hsf.fo)