Eyðun M. Viderø
Nú frættist, at leiðslan á strandferðsluni hevur í umbúna at steingja kioskina umborð á Teistanum fyri at fremja sparingar.
Í hesum "laksafosstíðum" tykist alt, ið nevnist sparing, at vera góður tónleikur, tó uttan at hugt verður eftir, hvussu stór veruliga sparingin er, ella hvønn týdning hetta fær fyri umhvørvið í hesum føri hjá ferðafólki um skopunarfjørð.
Her kann neyvan vera talan um týðandi upphæddir, og hvar er markið fyri, hvat er neyðugt at bjóða fólki fyri ferðaseðilin?
Uttan at kenna fíggjarstøðuna hjá kioskini so kann hetta ikki bjóðast ferðafólki. Mær kunnugt verður nógv keypt á ferðini, og fólk eru glað fyri at kunna seta seg við einum kaffimunni og onkrum afturvið.
So gott í tykkum: Latið kioskina vera opna eins og higartil við starvsfólki til gagns fyri manning og ferðafólk
Strandferðslan arbeiðir við nógvum milliónum, so møgulig sparing her er uttan týdning fyri samlaða úrslitið, men til stórt gagn fyri tey ferðandi!
