Endamálið við átakinum er at fáa øll børn og ung at bera endurskin, so tey síggjast betur í ferðsluni, nú vit rættuliga eru komin inn í myrku tíðina. Átakið er gjørt í samráð við Ferðslutrygd, sum tekur sær av at býta endurskini til allar vøggustovur, barnagarðar, barnaskúlar og framhaldsdeildir eins og miðnámsskúlarnar.
Jákup í Stórustovu í Sparikassanum sigur, at tað eitt nú í Havn er serligur ruðuleiki við skúlarnar um morgunin. Afturat tí er mótin svartur og gráur, og tað hjálpir ikki upp á støðuna, sigur hann.
Átakið fór av bakkastokki mikudagin, og fingu børnini í triðjaflokki í Sankta Frans skúla fyrstu endurskinini.
Innan góða viku er væntandi, at øll hava fingið endurskin.
