Hjá EB/Streymi eru tað trý stig fram til toppin, og hjá Víkingi eru fjarstøðan til toppin fimm stig. FM møguleikin er framvegis til staðar, nú tað resta trý umfør, men umframt fullari úrtøku er hann treytaður av, at tey bæði oddaliðini – NSÍ og HB – ikki vinna fulla úrtøku, og tí hevði tað komið best við hjá teimum, sum skulu hittast í Sarpugerði, at úrslitið í Gundadali verður javnleikur.
EB/Streymur og Víkingur hava dystast fyrr í ár bæði í Streymnesi og í Gøtu, og báðu ferðirnar var úrslitið 2-2.
Tá ið Víkingur sunnudagin tapti 1-0 á Toftum, var saknur í sentralu miðvallarunum Sam Jacobsen, Nenad Stankovic og Súna Olsen. Súni er langtíðarskaddur, og tað verður heldur ikki roknað við, at Nenad Stankovic verður førur fyri at spæla í morgin. Sam Jacobsen var leikbannaður, og hann er tøkur aftur.
Hjá EB/Streymi var Egil á Bø so mikið skaddur í 1-1 uppgerðini mánakvøldið á heimavølli ímóti HB, at hann ikki kom á vøllin, men sat á beinkinum alla tíðina. Tá kom Marni Djurhuus heim úr Danmark at hjálpa til. Tað er møguleiki fyri, at liðformaðurin verður førur fyri at spæla ímorgin.
