Sosialurin verður nú sendur ókeypis í hvørt hús í landinum mikudag. Hetta stigið verður tikið, tí leiðslan sær ein tørv á at koma í hvørt hús við blaðnum. Fleiri lýsarar ynskja hendan møguleikan at koma út til lesarar kring alt landið.
Frammanundan gevur Miðlahúsið út VikuBlaðið, sum verður borið í hvørt hús mánakvøld. Lýsarar hava tikið væl undir við hesum blaðnum, sum fer at halda fram sum áður. Men tørvur er at koma út mikudag eisini og serlig ynski eru frá lýsarum um at fáa hetta høvið í Sosialinum.
Blaðið verður sama tíðindablað sum áður, tó at nýggjar temasíður eisini verða í blaðnum.
Fyrsta útgávan av Sosialinum í hvørt hús verður borin út mikudagin 9. januar 2013.
