Almenna frumsýningin av filminum verður ikki fyrr enn í næstu viku, 14. november.
Filmurin snýr seg um stóra sorgarleikin í 1984, tá kona Nils Malmros, Marianne Tromholt, drap teirra nýggju mánaðir gomlu dóttur við at skera hana í hálsin.
Sosialurin hitti Nils Malmros í august, tá hann greiddi frá um filmin, uttan tó at greiða frá sjálvum innihaldinum, so vildi hann fegin greiða Sosialinum frá, at filmurin snýr seg um hendan svára sorgarleikin, sum var teimum fyri, tá konan í psykosu drap einkarbarn teirra.
Sjálvt um Marianne Tromholt var varðhaldsfongslað in absentia, var hon – eftir at hava ringt til løgregluna – so illa fyri av gerð síni, at politiið als ikki fekk avhoyrt hana.
– Men svarini eru í filminum, sigur Nils Malmros.
– Kona mín kom sum kunnugt ikki í fongsul, men fekk ein viðgerðardóm í hálvt annað ár.
Gjøgnum alla tilgongdina við filminum hevur tað eydnast Nils Malmros at halda innihaldið í filminum loyniligt – men tað verður so kunnugt í Føroyum í kvøld, meðan øll onnur verða noydd at bíða til í næstu viku.
Høvuðsleiklutirnar sum tey bæði, Nils Malmros og konan Marianne Tromholt, hava sjónleikararnir Helle Fagralid, sum er av føroyskari ætt, og Jacob Cedergren. Og Nils Malmros væntar sær nógv av teimum.
– Tey spæla sínar leikutir meistarliga væl, og eg eri vísur í, at Helle Fagralid fær eitt rættiligt gjøgnumbrot við hesum filmi, sigur Nils Malmros.
