Ein av kappingarneytunum hjá Sonna Ragnari Nattestad um pláss í miðverjuni hjá FC Midtjylland, Santiago Villafane, takkar fyri seg í felagnum. Felag og leikari eru vorðin samd um at strika sáttmálan alt fyri eitt.
Santiago Villafane, sum er úr Argentina, skrivaði á sumri 2012 fimm ára sáttmála við felagið, men eitt nú skaðar hava forðað fyri, at hann fekk sligið ígjøgnum. Hann hevur einans spælt 16 dystir á besta liðnum.
Sonni Ragnar Nattestad spælir í løtuni mest á næstbesta liðnum, men við einum kappingarneyta færri skuldi nú verðið rúmligari.
FC Midtjylland spælir leygardagin heima ímóti OB, og tá hevur miðverjuleikarin og liðskiparin, Kristian Bak, leikbann. Tískil kann hugsast, at Sonni Ragnar Nattestad verður at finna í hópinum, sum FC Midtjylland helst fer at almannakungera í kvøld ella í morgin.
