Vit skulu seta somu krøv til solarium, sum vit seta til sølu av sigarettum og rúsdrekka.
Tað heldur Brúkaraumboðið, nú samgongan ætlar at seta lóg í gildi, sum ger tað ólógligt at lata ung undir 18 ár, sleppa at brúka solarium.
Landsstýrið sigur, at hetta er fyri at fyribyrgja krabbameini.
Í hesum sambandi ætlar samgongan eisini, at allar solariumstøðir skulu vera mannaðar við starvsfólki yvir 18 ár
Men brúkaraumboðið heldur á heimasíðu síni, at tað kann eisini vera eitt krav, at skelti skulu setast upp, sum upplýsa um vandan við at brúka solarium.
- Hetta kann samanberast við upplýsingina á sigarettpakkum, sigur Brúkaraumboðið, Rannvá Ragnarsdóttir.
- Á henda hátt verða allir brúkarar ávaraðir um vandan.
Samstundis verður ávaringin ikki latin upp í hendurnar á starvsfólkinum á sólstøðunum og sostatt veldst ávaringin heldur ikki um, antin starvsfólkið boðar frá henni ella ikki.
Brúkaraumboðið mælir eisini til, at skelti veða sett upp inni í solarium-hølunum, sum boða frá, at loyvi er ikki at selja solarium til fólk undir 18 ár.
Hetta er sama somu krøv sum verður sett í sambandi við sølu av sigarettum og rúsdrekka.
