Tað var helst eitt bland av persónligari sannføring og realpolitiskum møguleikum, sum gjørdu at Karsten Hansen valdi Miðflokkin sum sín nýggja flokk.
Møguleikarnir eru størri fyri at blíva valdur í Miðflokkinum enn í Sjálvstýrisflokkinum, sum gongdin hevur verið seinastu árini.
Miðflokkurin fekk á seinasta løgtingsvali 1661 atkvøður, og tað gav flokkinum tveir eykavaldar tingmenn – Jenis av Rana í Suðurstreymoy og Bill Justinussen í Eysturoynni.
Í fleiri veljarakanningum hevur Miðflokkurin staðið til at fáa ein tingsess afturat, og tað er hendan tingsess, Karsten Hansen nú skal tryggja flokkinum.
Á seinasta løgtingsvali fekk Miðflokkurin 790 atkvøður í Suðurstreymoy og 466 atkvøður í Eysturoynni. Eftir hetta vóru valdømini hjá teimum rættiliga smá, men tað er rættiliga sannlíkt, at klárar Miðflokkurin at toga ein mann innanborða afturat, so fellir hesin maður sum eykavaldur í Norðoyggjum, og so stendur Karsten Hansen fyrst fyri.
Um Miðflokkurin skal vinna umdømisvaldan tingmann í Norðoyggjum, so er kravið fleiri enn 700 atkvøður, um grundarlag verður tikið í seinasta løgtingsvali.
