Tað hevði verið áhugavert at latið okkara lesarar In.fo gitt, nær kavamyndin oman fyri er tikin. Menniskjan gloymir skjótt, tá ræður um viðurskifti, sum ikki fylla so nógv.
Í øðrum førum vilja vit ivaleyst gloyma onnur ting, sum vit ynskja ikki skulu fylla ov nógv.
DMI sigur um veðrið í morgin - leygardagin - at ættin verður útsynningur og vestan, 5-10 metrar um sekundið, sum líðandi minkar niður í 3-8 metrar um sekundið. Hitin fer at liggja millum 7 og 10 stig.
Tá hetta er sagt, er rættiliga vist, at veðrið í morgin, 7. mai, fer ikki at kunna samanberast við veðrið 7. mai í fjør, tá viðhefta mynd er tikin í Vestmanna. Her er meira at kalla stórkavaveður, har stórar gravmaskinur eru í gongd.
Trupult er ikki at ímynda sær, hvussu seyðurin í haganum mundi hava tað um hetta mundið í fjør - og mitt í lembingartíð. Søgur eru um kavar, sum komu seint um várið og sum gjørdust bæði stórir og drúgvir.
