Mánakvøldið kl. 19 skipa Almanna- og heilsurøktarafelagið og Føroya Psykiatrifelag fyri almennum panelfundi í Miðlahúsinum.
Endamálið er at fáa at vita ?hvussu heilsurøktarin verður brúktur á arbeiðsmarknaðinum í dag?.
Hetta kvøldið leggur felagið tí upp til eitt kjak og ein dialog um teirra leiklut á arbeiðsmarknaðinum, soleiðis at fólk fáa kunnleika um førleikarnar og kvalitetin hjá heilsurøktarunum.
Panelluttakarar verða Helena D. á Neystabø, landsstýriskvinna í Mentamálum, Mary í Garði, stjóri í Nærverkinum og Naina Túgvustein, varastjóri á Landssjúkrahúsinum. Orðstýrari verður Rigmor Dam.
Sagt verður, at Heilsurøktarar vilja fegnir samstarva við allar starvsfólkabólkar í almanna- og heilsuverkinum.
- Tí vóna og vænta vit at leiðslur og samstarvsfelagar, so sum sjúkrarøktarfrøðingar, pedagogar, ergo- og fysioterapeutar og læknar koma til hetta tiltakið, sigur felagið í síni innbjóðing til fundin.
