Fjølmiðlakvinnan Solby Christiansdóttir hevur skrivað skaldsøgu, sum kemur út í september.
Skaldsøgan »Gloymdur« snýr seg um deyðsjúkan mann og sjúkrahúsverkið og byggir á veruligar hendingar.
– Ein maður liggur til at doyggja á Landssjúkrahúsinum, tí eitt mistak er hent. Men hví er tað komið so langt? Og hvør hevur ábyrgdina? Samstundis er politisk kapprenning um, hvussu Føroya Sjúkrahúsverk skal skipast í hæddini, verður sagt í umrøðu av bókini.
Solby Christiansdóttir er úr Klaksvík. Hon tók í 2009 útbúgving sum journalistur á Danmarks Journalisthøjskole í Aarhus og hevur síðan arbeitt í Kringvarpi Føroya. Áður hevur hon starvast á Sosialinum.
Forlagið Sprotin gevur bókina út og skrivar soleiðis í umrøðu av Solby sum høvundur:
– Áhugin fyri og hugurin at skriva birtist á ungum árum, men dirvið til at geva bók út var ein tigandi, stillførur dreymur í nógv ár. Tað skuldi nógv til, áðrenn dirvið var nóg stórt til at loypa út í tað.
Skaldsøgan »Gloymdur« kemur út í september.
