Um middagsleitið í gjár hækkaði Effo oljuprísin, og á midnátt kunngjørdi Magn júst somu príshækking.
Ein litur av gassolju – ella húsarhaldsolju – kostar í dag 13 krónur og 31 oyru. Tað eru 13 oyru meira, enn hann kostaði í gjáramorgunin.
Talan er um 28. prísbroyting síðani 24. februar, tá Russland gjørdi innrás í Ukraina.
Ein litur av bensini kostar 15 krónur og 16 oyru hjá Effo, tað sama, sum hann hevur kostað seinastu vikuna, tá hann lækkaði 32 oyru úr 15,48 krónum niður í 15,16 krónur.
Hjá kappingarneytanum Magn hevur bensinið seinastu vikuna kosta 15,23 krónur, 7 oyru dýrari enn hjá Effo.
Hinvegin hevur Effo nú hægri prís á diesel, enn Magn. Hjá Effo kostar ein litur av diesel 14 krónur og 5 oyru. Hjá Magn kostar hann 13 krónur og 99 oyru, ein prísmunur á 5 oyru.
Tað er sera óvanligt, at prísmunur er hjá feløgunum í meira enn ein dag, tá annað felagið tillagar prísin eftir hinum felagnum. Uppaftur meira óvanligt er tað, at oljufeløgini ikki hava felags prís á bensini og diesel í eina heila viku – og at tey ikki tillaga prísmunin, tá prísbroytingar verða gjørdar.
Støðan er so tann í dag, at annað oljufelagið hevur dýrari bensin, meðan hitt hevur dýrari diesel. Allir aðrir oljuprísir eru teir somu.
Síðani russisku innrásina í Ukraina er tað húsarhaldsoljan – gassoljan – sum er hækkað mest Føroyum. Hon er nú 47,9 prosent dýrari, enn hon var 24. februar. Bátadiesel er 45,7 prosent dýrari, diesel er 43,6 prosent dýrari, og bensinið – sum er hækkað minst, er nú 32 prosent dýrari, enn tað var 24. februar.