Tað er stuttligt at síggja, hvussu væl tey duga at hugna sær í Nólsoy, tó at bygdin bert telur stívliga 200 fólk.
Hetta góðveðurskvøld fyrst í vikuni lupu bæði kvinnur og menn á bláman, og onnur hugnaðu sær í bátum í góðveðrinum.
Nakrar kvinnur hava í eina tíð svomið regluliga á sjónum í Nólsoy, og við longum millumbili hava onkrir menn eisini verið við.
Men, hetta góðveðurskvøld vóru bæði kvinnur, menn og børn - yngri og tilkomin - á Malarenda og hugnaðu sær saman.
Tey flestu svumu á sjónum, og onnur stuttleikaðu sær í árabáti, og hetta kvøldið vóru eisini onnur við enn "harða" kjarnan í bygdini.
