Flogbóltur
Í dag er so dagurin, sum mong hava sæð fram til, nevniliga tann dagurin, tá tey bæði fremstu liðini í meistaradeildini hjá monnum, Fram og SÍ, hittast aftur.
Sum kappingin higartil hevur lagað seg, sær tað út til, at føroyameistarin skal finnast millum hesi bæði liðini, og dysturin í dag kann eisini avgera, hvør verður "jólameistari" hjá monnum ? við øðrum orðum hvør vinnur grundspælið og kann fara í jólafrí sum oddalið.
Um Fram vinnur í Sørvági í dag, fara teir fýra stig framum SÍ, og so verða teir ringir at taka hesumegin nýggjár. Vinnur SÍ hinvegin dystin, eru liðini aftur púra jøvn. Tá liðini møttust í Havn fyri einum mánaði síðani, vann Fram 3-1. Og Fram má eisini metast sum ein lítil favorittur, eisini tí teir enn hava vunnið allar dystirnar í kappingini - men hesin verður uttan iva tann truplasti higartil.
Meðan dysturin í Sørvági í dag er oddadystur, so er dysturin í Havn í morgin millum Fleyr og ÍF botndystur. Meðan tað hjá ÍF kanska ikki er so løgið, at teir liggja so illa fyri og hava tapt teir fyrstu fimm dystirnar í kappingini, so munnu teir í Fleyr ikki vera heilt nøgdir við úrtøkuna higartil. Fýra dystir og bara ein sigur er ikki júst tað, teir høvdu vónað, og sjálvt um vit enn bara eru í grundspælinum, so hava avrikini higartil
ikki verið nøktandi.
Av einum føroyameistara at vera hevur ÍF verið eitt vónbrot, men tað hevur havt sínar orsøkir. Av liðnum, sum vann gull seinasta kappingarár, eru fleiri farnir av, og ungir og nýggir menn eru komnir í staðin.
Frágreiðingin úr Fuglafirði er, at eitt nýtt lið skal byggjast upp, og tí verður ikki roknað við tí heilt stóra í ár. Fleyr er betra boðið upp á ein vinnara í morgin, men alt kann henda.
Mjølnir vitjar á Tvøroyri
Teir báðir kvinnudystirnir hetta vikuskiftið síggja eisini rættiliga spennandi út. Tað hevur verið skrivað upp og niður um TB, og úrslitini higartil hava eisini víst, at liðið er sera gott. Mótstøðuliðið í morgin er Mjølnir, sum í sínum seinasta dysti fyri tveimum vikum síðani fekk fyrstu stigini í posan.
Eftir ta søguligt vánaligu byrjanina upp á kappingina er Mjølnir nú aftur í menning, og kanska verða tær fyrsta liðið, sum koppar TB í ár. Men tað verður alt annað enn lætt.
Hin dysturin í morgin er millum Drátt og ÍF, og har er næstan ómøguligt at taka dagar ímillum sum nú er. ÍF hevur staðið seg væl í seinastuni, og liðið hjá Drátti sær eisini út til at vera komið eitt sindur fyri seg eftir eina trilvandi byrjan upp á kappingina.
ÍF er í løtuni næstfremst við seks stigum, meðan Dráttur á triðja plássi hevur f´ýra. TB er klárt á odda við tíggju stigum. Og verður tað soleiðis í morgin, at TB vinnur móti Mjølni, samstundis sum Dráttur vinnur móti ÍF, økist trygga leiðslan hjá TB, og so er tað longu greitt, at TB-kvinnurnar kunnu halda jól og nýggjár sum oddalið.
