Ein partur av fenaðinum, sum herfyri varð fluttur úr Vallalíð, er nú komin heimaftur. Hetta er hent, eftir at avgerð er tikin um, at ein partur av fenaðinum, sum var í umhvørvinum kring Heimið við Vallalíð, skuldi flytast heimaftur.
Tað var eitt kvøldið fyri eini tíð síðan, at bilur við umleið 60-70 fuglum - hønum, dunnum og gæs av ymiskum sløgum - fór umborð á Teistan á Gomlurætt og í Sandoynna, tí nú skuldi allur fenaðurin í Vallalíð takast av.
Nú eru so nakrar dunnur, nøkur høsn og nakrar bramgæs fluttar úr Sandoynni aftur í umhvørvið kring Heimið við Vallalíð, sum er bústovnur fyri minnisveik.
At hetta er til mikla gleði fyri búfólk, starvsfólk og fólk í grannalagnum man lítið vera at ivast í, tí reaktiónirnar vóru nógvar á heimasíðum og í sosialu miðlunum, tá fenaðurin var burtur.
