Enn einaferð mugu vit tíverri sanna, at lutir, sum liggja í bátum í Havn, eru ov freistandi fyri veikar sálir og langar fingrar.
Seinnapartin í gjár varnaðist Jóhan Restorff, bátaeigari í Havn, at ein DNG-snella var burtur úr báti hansara, sum lá við Langubrúgv í Havn.
- Vit bátaeigarar eiga at kunna líta á hvønn annan. Tað kann ikki vera rætt, at tingini ikki fáa frið, sigur ein Jóhan Restorff við Sosialin.
Snellan, sum hevur eitt virði upp á einar 30.000 krónur, er tikin úr bátinum í stilluviku, og bara stativið stóð eftir, tá hann kom umborð á bátin aftur aftan á páskir.
Tilburðurin er meldaður til løgregluna, sum sigur, at tað meiri enn so kemur fyri, at línur, snellur og annað hvørva úr bátum, sum liggja við bryggju.
Jóhan Restorff heitir á fólk, sum hava sæð ella upplivað okkurt illgrunavert, um at seta seg í samband við seg ella løgregluna.
