Í kvøld fara kappróðrarmenninir úr Vági suður aftur um Suðuroyarfjørð við Smyrli, eftir at teir í dag hava luttikið í kappróðrinum í góðveðrinum á Skálafjørðinum.
Smyril verður umborð á Smyrli í kvøld, og í viðførinum hava óførur vágbingarnir gullkrónur og steyp. Eftir sigur á norðoyastevnu og sera sannførandi sigur í dag eru teir stórir favorittar at vinna í heimasjógvi, tá ið jóansøka verður um eina viku, og teir eru eisini favorittar at vinna FM.
Í dag vóru Hvessingur og Sundabáturin saman við Smyrli framvið í startspurtinum. Skjótt misti Hvessingur eitt sindur, men Sundabáturin megnaði at halda tørn, inntil málið var hálvrógvið ella gott tað.
So vístu teir umborð á Smyrli, at tað vóru flest knotur í teimum. Smyril fleyst frá Sundabátinum, sum á málinum var væl meiri enn eina bátslongd aftanfyri Smyril og meiri enn eina bátslongd undan Hvessingi.
1 Smyril
2 Sundabáturin
3 Hvessingur
4 Gongurólvur
5 Tindur
6 Riddarin
7 Lómur
