Tað gongur væl hjá Smyril Line. Í øllum førum, um hugt verður eftir tveimum teimum seinastu roknskapum felagsins. Ársúrslitið fyri 2012 er upp á 11,8 milliónir krónur, meðan úrslitið fyri 2011 var upp á 9,3 milliónir krónur. Hyggja vit longur aftur, so síggja vit eitt hall upp á slakar 16 milliónir krónur í 2010, eitt tilsvarandi yvirskot í 2009 og eitt risa hall upp á 208 milliónir krónur í 2008, tá felagið varð umskipað á nýggjum fíggjarligum grundarlag.
– Vit gjørdu eina umlegging í 2010 og løgdu tá ta ætlan, sum í dag er grundarlagið undir rakstrinum, sigur stjórin á Smyril Line, Rúni Vang Poulsen, tá vit hitta hann á skrivstovu felagsins í Jónas Broncksgøtu í Havn – á økinum hjá Vilhelm Nielsen gamla, sum fyrr hýsti nógvum smiðjuvirksemi – sum fyrstu árini hevði nógv við báta- og skipaumvælingar at gera, men seinnu árinin sum bilsøla og bilsmiðja.
Prísbroyting gevur ávøkst
– Tað eru nøkur viðurskifti, sum vit kunnu gera nakað við, og tey fokusera vit uppá og hava stýr á. Framgongdin frá 2011 til 2012 heldur fram í 2013. Og tað merkir eina munandi framgond í ferðafólkatalinum, sigur stjórin, sum vísir á, at broytingin í prísum í 2011 hevur víst seg at hava givið ávøkst.
- Eitt nú hava vit valt at koyra við bíligum ferðaseðlum á flest øllum fráferðum, tá ið bílagt verður í góðari tíð. Uttanlands hava vit gjørt samstarv við ymiskar operatørar um at selja eitt nú apríl og oktober sum eitt »all inclusive Viking Cruise«, har vit halda ein rímiligan kostað til tess at fáa fleiri umborð hesa ársins tíð, og vit hava gjørt nógv burturúr at gera góðar pakkar til bæði Danmark, Ísland og Føroyar, har vit leggja okkum eftir at hava kappingarførar prísir.
Rúni Vang Poulsen sigur, at Smyril Line lækkar prísirnar fyri at fáa fleiri fólk umborð samstundis sum tey alla tíðina arbeiða við at betra um tilboðini og tænastuna til ferðafólkið, soleiðis at tænasta, útboð og prísstøðið ganga hond í hond.
– Tað er umráðandi, at vit hava ein kvalitet á internationalum støðið, sum vit føroyingar kunnu verða stoltir av.
Vaska botnin tríggjar ferðir um árið
Oljuprísurin er tó nógv tann størsta avbjóðingin.
– Vit hava sæð eina munandi hækking í oljuprísunum seinastu 2-3 árini, og tað er størsta av bjóðingin hjá okkum, sigur Rúni V. Poulsen. Hann vísir á, at Norrøna brúkar um hálvaaðru millión krónur um vikuna bara í olju. Tí eru nógv at spara við at fokusera nógv upp á orkusparing.
– Vit gera alt vit kunnu til tess at optimera sigling og drift. Tí hóast vit einki kunnu gera við oljuprín, so kunnu vit gera nakað við oljusparing. Í 2012 settu vit okkum fyri at spara fimm prosent í oljunýtsluni, sigur hann.
Sum dømi nevnir Rúni Vang Poulsen, at tey hugsa nógv um at minka ferðina, tí tað sparir nógva orku. Skipið skal liggja sum minst í havn og sum mest verða í sigling – tí skal ferðin økjast, so veksur oljunýtslan munandi, tí er stórt fokus á at belasta motorarnar sum minst. Hann nevnir eisini, at tey einar tvær til tríggjar ferðir um árið senda kavarar niður at vaska gróður undan botninum. Tað sparir munandi í oljunýtsluni, at gjar og tari ikki hongur undir botninum, meðan skipið siglur, heldur enn at botnurin er reinur og slættur. Eisini hava tey installerað oljusparingarskipanina hjá føroyska felagnum Greensteam.
Ikki upp á tal at sigla til Noregs og Bretland
– Og vit náddu væl yvir málið upp á fimm prosent, sigur Rúni Poulsen – tí úrslitið var átta prosent minni oljunýtsla.
– Hetta vilja vit gera enn betur í ár, tí vit ætla okkum at spara trý prosent afturat í ár, sigur hann.
At siglingin til Scrabster og Bergen er slept sæst eisini aftur í oljunýtsluni. Tann siglingin verður ikki tikin uppaftur, tí hon bar seg snøgt sagt ikki, sigur Rúni V. Poulsen.
– Tað kemur so ikki upp á tal – enn í hvussu so er. Men um ein føroysk oljuvinna fer at taka seg upp, so broytist støðan, og tá kann hugsast, at vit broyta støðu – eisini viðvíkjandi sigling til Bretlands. Men tað verður so ikki við Norrønu, tí hon er altso ikki ov stór til ta sigling, hon røkir í dag, sigur Rúni V. Poulsen.
Tað hevði tí verið trupult hjá Norrønu at røkt nakra aðra rutu í dag.
70 prosent uttan fyri Føroyar
Sambært stjóranum, so hevur tað hepnast væl, síðani prísirnir vórðu lækkaðir og ábøtur vórðu gjørdar umborð.
– Vit hava fingið nýggja matstovu The Diner, heitar pottar, fótbóltsvøll, »spælirúm« við spølum og play station og annað. Vit gera javnan mátingar um nøgdsemi hjá ferðafólkum fyri at bøta um tænastuna – og kanningarnar vísa, at ferðafólkini eru nøgdari. Vit fáa fantastiskar afturmeldingar frá ferðafólkum, sum siga, at starvsfólkini eru fryntlig og fyrikomandi, at tænasta er munandi hækkað og at tey bæði vilja viðmæla okkum til onnur og koma sjálvi aftur at ferðast við okkum – alt hettar gevur okkum á Smyril Line orku og árrræði at halda áfram við hækkað okkara góðsku og tænastu á øllum økjum sigur hann.
– Vit eru tó ikki komin á mál – men vit eru á veg. Tað er sera umráðandi at vit alla tíðina fylgja rákinum og at vit syrgja fyri at allir okkara kundar, ung sum gomul, útlendingar sum føroyingar, merkja at vit eru glað fyri at hava tey umborð.
At nógv ferðast við Norrønu er sjón fyri søgn, tí at kalla útselt er til oktober, hóast at tað enn sjálvsagt eru fráferðir millum Føroyar og Danmark har tøk pláss eru.
– Higartil eru vit eini 12-13 prosent framman fyri í sølu í mun til somu tíð í fjør, og eg rokni alt annað líka við einum betri úrslitið í ár, enn vit fingu í fjør, sigur Rúni Vang Poulsen.
Hóast ferðafólkini eru mong, so fyllir farmurin eisini nógv hjá Smyril Line.
– Virksemið í Føroyum er vaksandi og tað er farmurin sum kemur til og frá Føroyum við Norrønu eisini. Somuleiðis er frakt til og frá Íslandi eisisini er støðugt vaksandi, sigur stórin á Smyril Line, sum eisini vísir á, at gott og væl 70 prosent av ferðafólkunum hjá Smyril Line búgva aðrastaðni enn í Føroyum., eitt nú úr Týsklandi, Danmark, Hollandi, Frankaríki, Íslandi og aðrastaðni í evropa og skandinavia.
Tørvur á royndari manning
Manningin umborð á Norrønu er í nógv størri mun føroysk, enn hon var fyrr. Hetta skyldast fyrst og fremst samstarvi millum Smyril Line og ALS, sum rekrutterar fólk til Norrønu.
Fólkini fáa tó løn frá Smyril Line og ikki gjøgnum starvsvenjingarskipanina hjá ALS. Men nøkur av fólkunum fáa tó neyðugu skeiðini gjøgnum skipaninia hjá ALS.
At fáa føroyska manning er ikki lætt.
– Vit hava serliga trupulleikar við at fáa føroyskar útlærdar hotellkokkar og tænarar. Eisini hava vit trupulleikar við at fáa í tænastupartin við málsligum førleika, serliga í týskum, sigur Rúni Poulsen, sum heldur, at týskarar eru meira málsliga kenslubornir: Teir ikki so stinnir í enskum, og donsk starvsfólk eru stinnari í týskum enn føroysk starvsfólk.
Um fíggjarliga úrslitið upp á 12 millónir krónur sigur Rúni Vang Poulsen, at tað er ókey.
– Men eitt nøktandi úrslit átti at ligið eitt stað millum 15 og 20 milliónir krónur. Men vit hava fingið stýr upp á raksturin, sigur Rúni Vang Poulsen, sum tí sær ljóst upp á tað við vaksandi søluni og eftirspurninginum fyri framman – og vísir á, at vøksturin hjá Smyril Line gevur felagnum fíggjarliga styrki at hyggja frameftir.
