meistari
Avgerandi løtan í dystinum sunnudagin mundi vera, tá Tór-Ingar Akselsen slapp inn um miðverjuna hjá B36. Í longum løtum hevði HB annars verið trýst í botn, men við einari temjing, einum rykki og einum skoti koppaði ungi vágamaðurin øllum á høvdið.
Hetta var uttan iva krúnan á verkinum hjá Tór-Ingari, sum veruliga hevur fingið sítt gjøgnumbrot í ár. Eitt gjøgnumbrot, sum hevur gjørt til ein av stuðulsleikarunum hjá HB í seinnu hálvu, og sum eisini hevur ført landsliðsboð við sær.
Eftir dystin fingu vit orðið á Tór-Ingar, og hann duldi ikki fyri, at hetta setti eitt fyribils punktum fyri einum sera væl eydnaðum kappingarári.
- Hatta hevur heilt sikkurt verið eitt fantastiska gott ár. Og at eg so skuldi skora í einum slíkum dysti, sum í grundini var ein finala. Tað gjørdi tað bara enn betri, helt hann.
Í løtuni, tá tú fekst bóltin við tær inn um B36-verjuna. Hugsaði tú tá, at nú kundi tú gera av, hvar gullið skuldi?
- Ja. Tað ivaðist eg ikki í. Eg visti, at hasin bólturin skuldi bara inn, so eg smekkaði bara til. Og tíbetur gekk tað, og so var bara at jubla.
Og tað at tú so noyddist av vøllinum nakrar fáar minuttir seinni. Tað hevði kanska minni at siga?
- Tá ráddi jú bara um at halda fast, so Frank sendi ein miðvallarspælara inn fyri meg. Tað er eisini í fínasta lagi, so leingi tað er tað, sum er best fyri liðið.
Enn er ein dystur eftir at spæla, og tó at meistaraheitið nú er heima, so ivast Tór-Ingar ikki í, at HB eisini tá fer eftir sigrinum.
- Vit fara sjálvandi á vøllin fyri at vinna. Tað gera vit hvørja ferð. Men tað verður nokk eitt sindur meira róligt hesaferð. Tað ivist eg ikki í, segði ein fegin málskjútti at enda.
