VERKFALL
Tá løgmaður í fjølmiðlunum boðaði frá, at landsstýrið og samgongan ikki ætla at kalla tingið saman, so var hetta ikki ein útmelding, sum frøddi øllum. Fleiri halda óivað, at politiski myndugleikin eigur at leggja upp í, men fyrrverandi løgmaðurin, Atli Dam, heldur, at Anfinn Kallsberg skuldi farið til partarnar beinleiðis og ikki umvegis fjølmiðlarnar.
? Løgmaður átti ikki at givið pørtunum boð umvegis fjølmiðlarnar, men hann skuldi havt kallað teir saman og givið teimum eina ordiliga yvirháling, soleiðis at teir settu seg at finna eina semju, sigur ein avgjørdur Atli Dam.
Maðurin, ið longst av øllum hevur verið Føroya løgmaður, sigur við hesum, at Anfinn Kallsberg sleppur ov tíðliga.
?Tað er alla æru vert, at løgmaður og landsstýrið virða rættin hjá pørtunum á arbeiðsmarknaðinum at finna eina semju, men nú hevur verkfallið vart so leingi, at løgmaður má kalla partarnar saman, sigur Atli Dam.
Vit fáa ikki Atla Dam at siga, at løgtingið eigur ella ikki eigur at leggja uppí. Men Atli Dam heldur, at løgmaður fer ov leyst við bara at tosa umvegis fjølmiðlar, tí verkfallið hevur sett so stór spor og vart so leingi, at neyðugt er at fara meira aktivt inn í málið.
Og tað er fatanin hjá fyrrverandi løgmanninum, at Løgtingið ikki bara skal leggja upp í fyri at leggja uppí.
?Partarnir á arbeiðsmarknaðinum skulu røkja sína skyldu. Tað tykist sum um, at partarnir ? og serliga arbeiðsgevararnir ? bíða eftir, at løgtingið leggur uppí. Men hetta skulu teir ikki gera. Teir hava átikið sær eina ábyrgd, og hana kunnu teir ikki loypa frá, sigur Atli Dam.
Ikki tað sama
Einaferð í áttatiárunum syrgdi Atli Dam og táverandi samgongan fyri, at løgtingið skar ígjøgnum og lóggav um nýggjar sáttmálar.
?Støðan tá var ein heilt onnur. Tá samráddust feløgini ikki saman. Havnar Arbeiðsmannafelag legði stóran dent á eftirløn og Føroya Arbeiðarafelag legði ikki dent á hetta, og støðan gjørdist so kompleks, at tað tóktist ikki at gerast nakar enda á, og tískil var neyðugt hjá løgtinginum at skera ígjøgnum, sigur Atli Dam.
Støðan tá og nú eru hvør sínar, heldur Atli Dam uppá. Tað, at øll arbeiðarafeløgini samráðast saman, skuldi gjørt tað munandi greiðari og lættari at samráðast.
Hava uppiborið
Skulu vit tveita Atla Dam í bólk við arbeisgevarunum ella arbeiðarafeløgunum, so má hann bólkast við arbeiðarafeløgunum.
Hann tekur fult undir við Hans Joensen, formanni í Havnar Arbeiðsmannafelag, tá hann sigur, at gjógvin millum tey ófaklærdu og hini ikki má veksa, og tískil er neyðugt við einum størri lønarvøkstri, enn arbeiðsgevararnir vilja vita av.
Støðið til hesar samráðingarnar finna vit fyri tveimum árum síðani, sigur Atli. Tá fingu feløgini stóran lønarvøkstur og onnur feløg hava eisini merkt stóran lønarvøkstur. Atli Dam kallar hetta sálarligu bakgrundina, og hann skilur ógvuliga væl, at arbeiðarafeløgini ikki vilja gerast verri fyri í samfelagnum.
Atli Dam heldur tað vera átaluvert, at arbeiðsgevararnir ikki hava flutt seg longur, og verkfallið nú snýr seg um undir eina krónu fyri hvønn tíma.
?Tað er eisini burturvið, at arbeiðsgevararnir kalla til fund við teirri treyt, at tað skal vera innanfyri eitt mark hjá teimum. Tá roynir mann ikki eftir einari semju, sigur Atli Dam.
Ov nógv propaganda
Hesin seinasti mánaðurin við verkfalli hevur givið nógv pláss í bløðum og loftmiðlum til fakfelagstopparnar. Men hetta hevur ikki alt verið líka hugnaligt, heldur Atli Dam, og stórur tørvur er á góðum statiskum tilfari.
?Tað er alt ov nógv propaganda. Partarnir sita bara og skjóta aftur og fram eftir hvørjum øðrum við hvør sínum tilfari, sigur Atli Dam.
?Hetta hoyrir ongastaðni heima, sigur fyrrverandi løgmaðurin, sum heldur verkfallið hava vart leingi nokk, og tíðin er komin til at semjast.
