Landsstýrismaðurin í landbúnaðarmálum arbeiðir við kunngerð, sum skal geva føroyingum loyvi at skjóta grágæs part av árinum.
Fyri føroyskar bøndur og onnur, ið varða av landbúnaði, eru stóru flokkarnir av grágæs ein sonn plága, sum legst á bøin, og í fleiri førum er ynski ført fram um, at loyvi skal gevast at skjóta grágæs. Og nú er kanska vón fyri hesum.
Við útvarpið hjá Kringvarpinum sigur Jacob Vestergaard, at hann arbeiðir við broyting í veiðilógini, soleiðis at loyvi kann gevast at skjóta grágæst part av árinum.
- Tað hevur verið eitt ávíst ynski frá teimum, sum brúka bøin, um at fáa loyvi at skjóta grágæs. Akkurát hvussu uppskotið fer at síggja út, veit eg ikki enn, sigur Jacob Vestergaard.
Hann sigur víðari, at uppskotið verður lagt fyri landsstýrið í næstum, og er politisk undirtøka fyri hesum, verður lógaruppskot lagt fyri tingið.
