Samgongan ger nú greitt, at hon tekur ikki undir við uppskotinum frá Javnaðarflokkinum um at tey, sum eru liðug at lesa, skulu kunna fáa útgjald úr ALS í eitt tíðarskeið ímeðan tey leita eftir arbeiði.
'
Men samgongan ger nú greitt, at hon tekur ikki undir við málinum.
Vinnunevndin hevur viðgjørt málið og har ásanna Alfred Olsen, Bjarni Djurholm, Hanus Samró og Janus Rein, sum eru øll umboðini fyri samgonguna, at tær fíggjarligu umstøðurnar hjá teimum, sum akkurát eru liðug at lesa, eru ikki nøktandi.
Og í summum førum kann tað vera ein orsøk til, at lesandi í Føroyum fara uttanlands, tá tey eru liðug við lesnaðin, tí har hava tey betri, fíggjarligar sømdir.
Tað kann eisini vera ein orsøk til, at lesandi uttanlands aftra seg við at koma heim aftur eftir loknan lestur, tí so missa tey teir fíggjarligu fyrimunirnar.
Men samgongan vísir á, at landsstýrið arbeiðir við málinum.
Eitt nú arbeiðir landsstýrið saman við danska arbeiðsmálaráðið við at fáa í lag eina skipan, har lesandi varðveita somu rættindi, tey hava í Danmark. Tað merkir, at tey kunnu koma til Føroyar at søkja sær arbeiði, meðan tey fáa dagpengar úr Danmark í eina tíð.
Eisini arbeiðir landsstýrismaðurin í vinnumálum saman við tí nývalda stýrinum í ALS við at finna eina nøktandi loysn fyri tey lesandi í Føroyum eftir loknan lestur.
Samgongan heldur, at tá ið landsstýrismaðurin í vinnumálum arbeiðir við málinum, eigur hann at fáa frið til at gera arbeiðið liðugt og tí vilja tey ikki taka undir við uppskotinum frá Javnaðarflokkinum.
