67 ára gamli Eiður Guðnason hevði í dag sín fyrsta arbeiðsdag sum íslendsku aðalkonsul í Føroyum. Í gjár var móttøka í Norðurlandahúsinum, og í dag byrjaði vanligi arbeiðsdagurin í Fútastovu, sum komandi árini skal húsa íslendska aðalkonsulatinum.
Dagurin í dag hevur verið meiri merktur av at fáa tey praktisku tingini at virka, heldur enn stórum hugsjónum millum londini bæði.
- Konan og eg vita, hvar vit skulu búgva, men áðrenn vit kunnu flyta inn, skulu húsini setast í stand, og tað fer helst at taka einar tveir mánaðir, sigur Eiður Guðnason, sum eisini nýtti fyrsta dagin til at fara í bankan og at vitja løgmann úti í Tinganesi.
Afturat sær hevur íslendski aðalkonsulin ein skrivara, sum er ein íslendsk kvinna, ið hevur búð í Føroyum í 10 ár.
- Vit hava havt nokk at gjørt og hava fingið nógvar heilsanir við blómum og gávum. Upplatingin hevur hevur eisini fingið stóran ans í Íslandi, og bæði sjónvarp og aðrir íslendskir fjølmiðlar hava verið á vitjan, sigur Eiður Guðnason, ið sær sær tað sum sína størstu uppgávu at knýta bondini millum Føroyar og Ísland uppaftur tættari.
- Áhugin fyri Føroyum í Íslandi er stórur, og tað verður sjálvandi ein týdningarmikil uppgáva hjá mær at fremja hetta samstarvið.
Fyri trimum vikum síðani, tá Eiður Guðnason kom fyrstu ferð at skoða viðurskiftini í Føroyum, segði hann, at tað finnast valla nøkur øki, har føroyingar og íslendingar ikki kunnu samstarva. Til dømis innan handil, ídnað, heilsu og ikki minst á mentunnarøkinum.
