Fríggjadagin letur ein nýggj framsýning upp á Listasavni Føroya. Framsýningin heldur fram til 7. oktober.
Listakvinnan eitur Jónína Guðnadóttir, og hon nevnir framsýning sína: Tilverulig minimalisma.
At flúgva millum Føroyar og Ísland varar ein slakan tíma, og málsliga og
mentanarliga er lítil munur millum londini bæði. Listasøguliga harafturímóti
víkja londini týðiliga frá hvørjum øðrum. Meðan náttúruborna
ekspressionisman hevur verið ráðandi í føroyskari list við Mikines og Ingálvi
av Reyni og øðrum, hevur íslendsk list verið meiri avant-garde og fylgt altjóða
listarákum. Óivað hongur hetta saman við politiska sjálvbjargni og
sjálvskenslu íslendinga, og at teir hava tætt tilknýti til amerikanarar, sum líka
til 2006 høvdu hernaðarstøð í Keflavík.
Ikki fyrr enn nýliga eru altjóða listarák sum minimalisma og konseptualisma
at síggja í føroyskari list. Slík rák hava harafturímóti havt stóran týdning í
Íslandi tey seinastu áratíggjuni, har listafólk hegnisliga hava arbeitt við at
sjóða eina einfalda og stranga minimalismu saman við hugsunarliga
innihaldið í konseptualismuni í eina hægri eind.
Eitt av hegnigu listafólkunum er keramiski myndahøggarin Jónína
Guðnadóttir (f. 1943), hvørs høggmyndir og installatiónir viðgera evni sum
dálking, brúkarasamfelagið og gloymd minni. Verkini viðgera eisini tann
gamla heimin, bóndasamfelagið og gudalærur. Alt strangt og abstrakt
viðgjørt, men tó sansaligt og fjálgt. Andi og lív hittast í listini hjá Jónínu
Guðnadóttur.
