Ísland hevur nú eisini sett sær eina størri svartkjaftakvotu fyri 2016. Upprunaliga ásetti Ísland sær eina kvotu á 126.000 tons, sum svarar til tey 16,2 prosentini, ið Ísland átti eftir tí gamla svartkjaftabýtinum.
- Í kunngerð 4. apríl hevur íslendska Fiskistofan ásett, at svartkjaftakvotan í ár verður hækkað upp í 163.570 tons. Hetta eru 21 prosent av tilmælinum hjá ICES, sum í 2016 er á 776.391 tons.
Tað veit heimasíðan hjá Nótaskipum at siga í dag.
Frammanundan hava bæði ES, Noreg og Føroyar ásett sær størri kvotur fyri 2016, enn gamli býtislykilin hevði givið, og tí fer samlaða veiðan í ár upp um eina miljónir tons. Hetta er meira enn ein triðingur meira enn tilmælið.
- Í 2015 eydnaðist tað ikki strandalondunum at semjast um býtið av svartkjaftakvotuni, tí ES og Føroyar halda seg eiga rætt til ein størri part av heildarkvotuni. Tað eydnaðist heldur ikki í ár at fáa semju um eitt býti, og tí áseta londini sínar kvotur hvørt í sínum lagi.
Nótaskip vita at siga, at íslendsk skip frítt kunnu fiska alla sína kvotu í føroyskum sjógvi, eisini kvotuna, ið nú er komin aftrat. Í løtuni fiska níggju íslendsk svartkjaftaskip í føroyskum sjógvi. Tey royna saman við hinum skipunum heilt suður móti føroyska markinum og landa í Íslandi.
- Higartil í ár hava íslendsk skip fiskað 60.000 tons av svartkjafti í føroyskum sjógvi. Í 2015 var samlaða veiðan 193.000 tons.
Nótaskip vita at siga, at íslendingar eru ikki líka so lagaligir við føroyingar, sum føroyingar eru við íslendingar í hesum føri.
- Íslendingar seta sum krav, at ein partur av føroysku lodnukvotuni skal landast í Íslandi, og hóast tað í mong ár undir árligu fiskiveiðisamráðingunum hevur verið roynt at fáa hesa forðing burtur, so hevur tað ikki eydnast enn, verður lagt aftrat.
