Toskaprísurin er framvegis hin sami, og hann er næstan tvífalt so frægur sum hýsuprísurin. Soleiðis var eisini, tá Fiskamarknaður Føroya í morgun seldi stívliga 96,4 tons á uppboðssølu.
Meginparturin av fiskinum, sum varð seldur á marknaðinum í morgun, var toskur, mest av toski 2 og 3. Besti toskaprísur var fyri tosk 1, sum fekk 23,88 krónur í miðal fyri kilo.
Nøgdirnar av toski 2 og toski 3 vóru á leið tær somu - ella 18,7 tons av toski 2 og 19,1 tons av toski 1. Miðalprísurin fyri tosk 2 var 23,37 - og miðalprísurin fyri tosk 3 var 20,78.
Eini 16 tons vóru av hýsu, og her lá miðalprísurin millum 11,75 og 12,98 krónur fyri kilo, og tað var hin størsta hýsan - hýsa 1 - sum fekk besta miðalprísin.
Nøkur tons vóru av longu, kongafiski og svartkalva. Besti miðalprísur á longu var 18,50, kongafiskur fór fyri miðalprísin 9,21 - og miðalprísurin fyri svartkalva var 31,69 krónur fyri kilo.
Tey stívliga 96,4 tonsini á marknaðinum í morgun fóru fyri stívliga 1,8 miljónir krónur, sum gevur ein miðalprís fyri øll fiskasløgini samanlagt á 18,87 krónur fyri kilo.
