Spanska løgreglan skeyt í gjárkvøldið við gummikúlum eftir fólki, sum vóru í miðbýnum í Madrid og mótmæltu búskaparpolitikkinum hjá stjórnini. Sum skilst lat løgreglan skot av, tá nøkur mótmælisfólk royndu at bróta niður byrgingina, sum løgreglan hevði sett upp rundan um tinghúsið.
Fjølmiðlarnir skriva, at nógv fólk vórðu løstað, og at fleiri vórðu tikin.
Mótmælisfólkið kravdi, at stjórnin skal havna tilboðnum frá ES um eitt hjálparlán, sum er ætlað at bjarga bankakervinum, og partarnir hava umrøtt møguleikan fyri einum láni afturat. Nógv fólk kravdu eisini nýval, tí tey siga, at tann borgarliga stjórnin hevur ikki hildið vallyftini.
Andstøðan og nógv mótmælisfólk siga, at tey stóru lánini, sum stjórnin ætlar at taka, fara at tyngja komandi ættarlið.
